Bible

1 第二年春天，就係所有个王出去相㓾个時，約押帶領軍隊佔領亞捫人个土地；總係大衛王還留在耶路撒冷。約押將拉巴城打下來。 2 亞捫人个神像米勒公有一頂金冕旒，大約重三十五公斤，有鑲寶石。大衛將寶石剝下來，鑲在自家个王冠頂。佢也對城肚搶到盡多戰利品， 3 將該城个人民拉出來，強迫佢等用鋸仔、鐵耙、斧頭做工。大衛也共樣對待其他亞捫城市个人民。然後大衛㧯佢个大軍就轉耶路撒冷去。 4 後來，以色列人在基色又㧯非利士人相㓾。該時，戶沙人西比該㓾死一個巨人安到細派，非利士人就打輸了。 5 以色列人又㧯非利士人相㓾。睚珥个孻仔伊勒哈難㓾掉迦特人歌利亞个兄弟拉哈米；這人个槍柄像織布機个車心恁粗。 6 後來在迦特又有戰爭。該地方有一個巨人；佢个手指㧯腳趾攏總係六支，總共有二十四支。佢係古時巨人个後代。 7 佢向以色列人罵陣；大衛个阿哥示米亞个孻仔約拿單將佢㓾掉。 8 以上三個人全部係迦特巨人个後代；佢等全部死在大衛㧯厥部下个手中。